Mbrojtësi i Kombëtares Shqiptare, Ivan Balliu, vlerësohet nga prestigjozja “L’Equipe” si një nga lojtarët më të mirë të kësaj fundjave në futbollin francez duke u përzgjedhur në formacionin më të mirë. 

Mbrojtësi kuqezi vlerësohet me notën 7 pas paraqitjes perfekte në transfertën e Angers ku u aktivizua si mbrojtës i djathtë në formacionin 4-4-2 të trajnerit Philippe Hinschberger te Metz.

25-vjeçari u aktivizua gjatë gjithë ndeshjes duke e ndihmuar ekipin e tij të arrinte një sukses shumë të rëndësishëm me rezultatin 1-0. Në  formaconin ideal të javës së 6, ai rreshtohet në krahun e djathtë të mbrojtjes me 5 lojtarë dhe sipas “L’Equipe”, Balliu fitoi çdo duel duke pësuar madje edhe 3 faulle.

Në fundin e ndeshjes, ai arriti të ruante të paprekur portën e Mertz pasi topi po drejtohej në rrjetë. Me një ndërhyrje vendimtare në vijën fatale, Balliu ruajti avantazhin e skuadrës së tij, shkruan “SuperSport.al”.

Mbrojtësi shqiptar është lojtari i vetëm i Metz që përfshihet në frmacionin më të mirë të javës ku bëjnë pjesë gjithashtu edhe emra me peshë të kampionatit francez si Falcao, Rabiot apo Malcom. 25-vjeçari shqiptar i lundur në Spanjë numëron 4 ndeshje si titullar këtë sezon me fanellën e Metz ku ka arritur të kthehet në një pikë referimi për skuadrën franceze.